5’EMÎN PÊŞBIRKA ŞANONIVÎSIYA BI XELAT DEST PÊ KIR

Ji bo tevlibûna 5’emîn Pêşbirka Nivîsandina Lîstikên Şanoya Kurdî ya Ebdurrehîm Rehmî Hekarî ya Şanoya Bajar a Şaredariya Bajarê Mezin a Amedê serlêdan dest pê kirin

Ramazan OLÇEN / AMED

Şanoya Bajar a Şaredariya Bajarê Mezin a Amedê (DBŞT) bi boneya ku nivîskariya lîstika kurdî bi pêş bixe û berê nivîskarên ciwan bide nivîsandina lîstikên şanoyê û her wisa bi mebesta ku lîstikên nû li wêjeya şanoya kurdî zêde bike û van xebatan li nav civakê belav bike vê pêşbaziyê li dar dixe. Xelatên pêşbaziyê dê li ser navê nivîskar Ebdurrehîm Rehmî Hekkarî ku yekem teksta şanoya kurdî ya bi navê ‘Memê Alan’ nivîsandiye, bên dayîn.

SÎNOR BO MIJARÊ TUNE YE

Di pêşbirkê de tu sînorê mijarê nîn e, nivîskar dikare bi xebateke nû û xweser beşdar bibe, her wiha dikare ji roman, helbest an jî bîranînekê jî nivîsa xwe ya şanoyê durist bike. Nivîsên ku bo pêşbirkê bên şandin divê heta dema dawîn a serdana pêşbirkê li tu derî nehatibin weşandin, di tu şanogehan de nehatibin pêşandan û di tu pêşbirkan de xelat nestandibin. Tekstên pêşbirkê divê herî kêm 30 hezar karekterên bêvalayî yên komberzkê pêk hatibin û her nivîskar tenê dikare bi berhemekê beşdarî di pêşbirkê de bike. Dema herî dawîn a bo serlêdana pêşbirkê 27’ê sibata 2015’an.

LIJNEYA HILBIJÊR

Derhênerê Giştî yê Hunerê yê DBTŞ’ê Ruknettîn Gun der barê pêşbirka ku ev cara 5’emîn e tê lidarxistin de axivî û der barê şertên serlêdanê de agahî dan. Gun da zanîn ku nivîskarên dil heye beşdar bibin dikarin nivîsên xwe bi CD an jî bi formateke dîjîtal bi destên xwe teslîmî Şanogeha Bajar bikin, yên ev derfet tune be dikarin berhema xwe bi rêya posteyê bişînin. Gun aşkera kir ku di desteya hilbijêr de kesên weke Helket Adrîs, Rûgeş Kirici, Dilawer Zeraq, Gulê Ozalp Ulusoy û M. Emîn Yalçinkaya hene û wiha got: “Tekstên ku xelatê bistînin dê ji aliyê Desteya Repertuara Şanoya Bajar ve bên nirxandin û wekî pirtûk ji nav Weşanên Şaredariya Bajarê Mezin bên çapkirin.”

XELATÊN BO BERHEMAN

Gun diyar kir ku encamên nirxandina lijneyê dê di hefteya yekemîn a gulanê de bên diyarkirin û ligel vê jî encamên pêşbaziyê dê li ser malpera Şanoya Bajar jî bên daxuyandin û her wisa xelatgir dê bi rêya telefon an jî e-peyamê bên agahdarkirin. Gun têkildarî xelatên ku ew ê îsal bidin jî ev tişt gotin: “3 berhemên di pêşbirkê de wekî berhemên serkeftî bên niqandin dê her yek ji wan bi 3 hezar TL’î bên xelatkirin.”

NAVNÎŞANA SERLÊDANÊ

Gun anî ziman ku nivîskarên serî li pêşbirkê bidin divê bi du zerfên cuda ku yek ji bo nivîsara lîstikê, yek ji bo agahiyên serlêder (nav, paşnav, navnîşan, kurtejiyan, jimareya telefonê) bixin nav zerfekê û li ser zerfan tenê nasnav/mexlas hebe; divê bi tu awayî navê rastîn li ser zerfan û li ser nivîsara lîstikê tune be. Tekstên ku ev şert tê de pêk nehatibin dê ji pêşbirkê bên derxistin. Berhem dikare ji bo vê navnîşanê bên şandin: Elazig Caddesî, Diyarbakir Buyukşehîr Belediyesî Şehîr Tiyatrosu Yenîşehîr/Diyarbakir. Her wiha bi telefona 0 (412) 223 49 42’yê dikarin têkiliyê deynin.